حسني عبد ربه لصدى: طبيعي أن نشجع الجزائر في المونديال
[ندعوك للتسجيل في المنتدى أو التعريف بنفسك لمعاينة هذه الصورة] دبي - صدى الملاعب
اعتبر نجم أهلي دبي والمنتخب المصري حسني عبد ربه أن كرة القدم بدون جمهور لا معنى لها، وأضاف في تصريحات حصرية لبرنامج صدى الملاعب أنه من الطبيعي أن يشجع المصريون ممثل العرب في المونديال المقبل وهو منتخب الجزائر، كما تحدث عن محطته المقبلة، فماذا قال؟
ماجد التويجري: الأحلى إيه، إنكو رحتو حققتوا كأس إفريقيا تلات مرات ورا بعض وإنجاز ما عملوش أي منتخب إفريقي، أو إنكو رحتو كأس العالم؟
حسني عبد ربه: لا كأس العالم أهم من أي شيء، يمكن بالنسبة ليا أنا كأس العالم أكبر حاجة في..
ماجد التويجري: الجزائر تستاهل؟
حسني عبد ربه: أكيد الجزائر بنقولهم مبروك بغض النظر احنا..
ماجد التويجري: حتشجعها؟
حسني عبد ربه: احنا عرب واحنا مسلمين فما ينفعش أن هما يلاعبوا منتخبات أمريكا ولا إنجلترا ولا الفرق دي واحنا نشجع الفرق التانية، أكيد منتخب الجزائر، احنا بنتمنى له يشرف الكرة العربية والكرة الإفريقية، بغض النظر أن احنا في مواقف أو في أي حاجة، دي كورة والمواقف بنخليها على جنب.. إنما في تشجيع..غياب الجمهور
ماجد التويجري: عجبك الدوري الإماراتي؟
حسني عبد ربه: أنا عاجبني الدوري بس الجمهور هو رقم واحد، لأن كرة القدم من غير جمهور ما تبقاش كرة قدم..
ماجد التويجري: ومفيش جمهور في الإمارات؟
حسني عبد ربه: أكيد يعني ما أعتقدش باستثناء العين أو الوحدة لأنه الوحدة بردو بتنافس، ما أعتقدش إنه في جمهور تاني ممكن يملا الإستاد، يمكن احنا لظروفنا ممكن السنة اللي فاتت كان بيبقى في جمهور، إنما أنا بتكلم بشكل عمومي الدوري الإماراتي اللي مأثر عليه بشكل عام الجمهور؛ لأنه زي ما بقولك كرة القدم هي جماهير، فلو في جمهور أكيد اللعيب من نفسه بيدي، في حماس، لو انت مغلوب في جمهور بيشجعك بتحاول تعوض، لو انت أداءك وحش بتحاول أن انت تيجي على نفسك وبتزيد من أداءك عشان خاطر الجمهور ده، فأنا شايف الكرة الإماراتية ناقصها بس الجمهور..الإسماعيلي في القلب
ماجد التويجري: انت ما شا الله عليك يعني نجم تقيل في المنتخب المصري وليك اسمك، وغالبا النجوم الكبار وبالذت في مصر بيختاروا يروحوا أوروبا مثلا، ما رحتش ليه؟
حسني عبد ربه: لا.. ما هو مفيش حد بيختار بمزاجه، ربنا سبحانه وتعالى اللي بييسر للعبد أموره، بكون هنا أو هنا.. ده بأمر ربنا سبحانه وتعالى، فأنا أكيد في طموح وفي هدف أدامي نفسي أحققه.. أن أحترف برة دي معنديش مشاكل فيها، لكن هي الفرصة ما جاتش.
ماجد التويجري: طيب في طموح، في عروض؟
حسني عبد ربه: لأ لحد دلوأتي مفيش، كان بعد بطولة 2008 كان عندي عروض وعروض جدية، يمكن كان أقرب عقد ليا أن أنا ممكن أتكلم فيه لأن أنا ما أتكلمش غير في حاجة رسمية، كنت رايح بلفيكا وخلاص الأمور كانت واصلة لشكل نهائي لكن القضية اللي كانت مع الإسماعيلي والأهلي المصري وستراسبورج أثرت في الموضع بشكل كبير، والفرقة اللي كانت تيجي انت عارف فرق أوروبا لما بيبقى في مشكلة بيبعدوا شوية، إنما بردو دة ما يمنعش إنه أنا عندي طموح وعندي الهدف اللي أنا نفسي أحققه.. أن أنا أحترف في نادي كبير برة، لكن لو ما حصلش مش حتكون نهاية المطاف.
ماجد التويجري: بتحن للإسماعيلي؟
حسني عبد ربه: أكيد..
ماجد التويجري: طيب والأهلي؟
حسني عبد ربه: لأ أنا عايز أقولك حاجة، يمكن الموضوع دة ناس كتير بردو الواحد عشان الحمد لله بفضل ربنا الواحد لما بيكون ليه وضعه وليه مكانته أكيد الناس كلها همها إنه هو يبقى في نادي الأهلي أو نادي الزمالك، لأن هما دول الأندية اللي ممكن يبقوا على المستوى العربي أو الإفريقي المعروف
ماجد التويجري: بالذات الأهلي؟
حسني عبد ربه: لا الزمالك والأهلي.
ماجد التويجري: الزمالك مختفي من فترة؟
حسني عبد ربه: أنا بس عشان ما تدخلنيش في حوارات تانية، أنا بقولك النادي الإسماعيلي بالنسبة لي هو كل حاجة، يعني أنا مش بتكلم كلام تلفزيون، أنا مرتبط بعقد مع نادي الإسماعيلي، أنا كنت طالع دبي سنتين إعارة فاضلي سنة في نادي الإسماعيلي، فأنا مرتبط بعقد ما ينفعش أروح أي حتة، فأنا مرتبط بعقد مع النادي الإسماعيلي وحرجع للنادي الإسماعيلي.. والله يعلم إيه اللي حيحصل بعد كدة.
الأحد 12 أبريل 2015, 17:06 من طرف 
